Act 24 | MED | STEP | Rumbᵾⱡ 5 omba puⱡnga, pris kuimbal morum wu Ananaiyas ndi, atinga manga rup molk etmin wu mat kᵾn, mi ik pili wu Tertalas kᵾn mbᵾ, tᵾpa mepa Sesariya kona purum. Wu kᵾⱡ puk, gapman nga peng mumuk wu Piliks nga kuimp keta ila anggilik kᵾn, en enim nga namba ik ning, orung mbᵾ kundᵾk nᵾtᵾng. Wote, Pol wi rok tilingina kᵾn, wu Tertalas ndi, Pol mong titim nᵾk etᵾng ik mbᵾ, mon ila kᵾmp ropa ei, mel nitim, “Wu Nuim Piliks, nim nga numan kai ila, tᵾn Jura wamp mbᵾ moⱡᵾp, kundi uⱡ ila moⱡᵾp kai mondurmin, el etpᵾn uⱡ ti iti natᵾtmᵾn ku. Nim nga numan kai ei tekᵾn moⱡina kᵾn, tᵾn wamp mbᵾ nga kona mbila elpa elpa etpa kit murum uⱡ mbᵾ, nim ndi, tᵾk rapundkᵾn etᵾk kun mundrᵾn.

Acts 24

Pol Ni, Piliks Kᵾn Kot Enditing

1 Rumbᵾⱡ 5 omba puⱡnga, pris kuimbal morum wu Ananaiyas ndi, atinga manga rup molk etmin wu mat kᵾn, mi ik pili wu Tertalas kᵾn mbᵾ, tᵾpa mepa Sesariya kona purum. Wu kᵾⱡ puk, gapman nga peng mumuk wu Piliks nga kuimp keta ila anggilik kᵾn, en enim nga namba ik ning, orung mbᵾ kundᵾk nᵾtᵾng. Wote, Pol wi rok tilingina kᵾn, wu Tertalas ndi, Pol mong titim nᵾk etᵾng ik mbᵾ, mon ila kᵾmp ropa ei, mel nitim, “Wu Nuim Piliks, nim nga numan kai ila, tᵾn Jura wamp mbᵾ moⱡᵾp, kundi uⱡ ila moⱡᵾp kai mondurmin, el etpᵾn uⱡ ti iti natᵾtmᵾn ku. Nim nga numan kai ei tekᵾn moⱡina kᵾn, tᵾn wamp mbᵾ nga kona mbila elpa elpa etpa kit murum uⱡ mbᵾ, nim ndi, tᵾk rapundkᵾn etᵾk kun mundrᵾn. 3 Uⱡ mbᵾ nga kandᵾp pilpᵾn elimina, tᵾn nga numan orunga wang nᵾnᵾm. Tᵾn ndi, nim kᵾn angge nᵾnmᵾn. 4 Ei nga, na ndi, nim nga ik mong mat ruⱡ etᵾp ni nᵾnimp. Na ndi, nim waldᵾnt ei, nim ndi, kapⱡa tᵾn nga ik nimin ei, numan kai pilkᵾn, kum tiyana ik kᵾⱡ namin. 5 Tᵾn ndi, wu ei, punt mong uⱡ mbᵾ tᵾtᵾm wu ti, nᵾmp kandᵾrmᵾn. Jura wamp kona elpa elpa pek purmin mbᵾ kᵾn pora, andpa ik nimba, el pendpa etᵾm. Wote, wu ei ndi, tᵾn nga rᵾⱡaip ei kᵾn, oi kan pendpa, elim Nasaret wamp rᵾⱡaip mormin ei nga kuimbal morum. 6 Wote, tᵾn nga manga wingti ou ei, etpa ⱡar mondᵾmba itim ila tᵾp imp murmᵾn. [Wote tᵾn ndi, wu ei, tᵾn nga mbo uⱡ etmin mi ik ila kᵾmp timin elimina, el wu kuimbal morum wu Lisiyas ndi, tᵾn kᵾn el mondpa wu ei, roldᵾpa tᵾpa mepa purum. 8 Wote Lisiyas ndi, nimba mel, ‘Ik ti wu ei kᵾn, ning em ndam, nim Piliks nga kuimp keta ila pin ku,’ nitim.] Nim ndi, wu ei waldᵾk, pin ndam, ik nimbᵾ ninim pilik tin ku,” nᵾtᵾng. 9 Wote Jura wamp mbᵾ ndi, ik nitim kᵾⱡ kupa, mint nᵾtᵾng.

Pol, Wu Piliks Kᵾn Elim Nga Orunga Nitim

10 Wote, gapman wu peng mumuk ei ndi, Pol ik nangga nilinga, Pol kundpa, nimba mel, “Na pilip mor ei, ya mᵾi kona mormun ei, nim ndi, rᵾp etkᵾn oⱡina, pana ou ndupa omba punum. Ei nga, na numan kai pilip, nim nga kuimp keta ila, na kᵾn ik nᵾnmᵾn ei nga, punt rop nᵾnt nitim. 11 Wote nim pilᵾn ku, rumbᵾⱡ 12 omba purum ni kᵾn, na Jerusalem manga wingti ou ila mbi paka ruimp pilip pur. 12 Na Jura wamp ti kᵾn, manga wingti ou ila kep, kel ila kep, wamp mat el kaⱡᵾp uⱡ ti, etᵾp moⱡmba kandᵾk ti natᵾtᵾng. Wote, kona peng ei nga kona kel tetᵾm mbila mon ku. Wote akup, na kᵾn ik nᵾnmᵾn mbᵾ nga ik puⱡ ti, para nduk nᵾk, ekit ndui nandᵾnmᵾn. Uⱡ ei ndi, nim ik kupa ti, kanda pili nᵾpᵾlᵾn. 14 Na ndi, nim kundᵾp nᵾnt ei, na ndi, tᵾn nga anda kouwᵾmᵾn mbᵾ nga Got nga mbi paka rundᵾr uⱡ ei, Jura wamp mbᵾ ndi, etᵾk kit mondrum orunga pur. Wote, Moses nga Mi Ik na, pai nui wu mbᵾ nga mon rorung ik mbᵾ, mondpa pili orunga pᵾt. 15 Jura wamp en enim ndi, wamp kit kai korung mbᵾ, kont ⱡoprᵾk muⱡing nᵾtmin ei mel, wote na numan tenda ei ku pᵾt. 16 Ei nga, na nanim ronduⱡ mundᵾp, Got nga kep, wamp nga mong waⱡ ila kep, na nga numan orunga kᵾn, mint piyangga nᵾmp kᵾn, uⱡ mbᵾ pilip et.

17 Jerusalem wak rop pana ou ndupa, kona elpa mat ila moⱡᵾp, tᵾp mundᵾp, wote na nga wamp mbᵾ kᵾn, ku moni mat mep omp ngump, wote Got kᵾn angge nᵾmp, mel mat nguimp mep ur. 18 Na uⱡ kᵾⱡ etᵾp, wote etpa kai mundi uⱡ ei, etᵾp manga wingti ou ila moⱡmba ok kandrung. Wote, wamp minal muⱡi nambᵾⱡᵾngina, na uⱡ ⱡawa mat iti nᵾtᵾt mon. 19 Wote, Eisiya kona ila Jura wamp mat ok, ila morung wamp kᵾⱡ ndi, na kᵾn, ik ning ndam, kapⱡa ya ila ok ning. 20 Wote mon ndam, ya wu kᵾⱡ ndi, na namba uⱡ it ei mel, en enim nga kaunsil mo rorung ila, kandᵾk tᵾtᵾng ei mel, akup nᵾk mot nduing. 21 Wote, ik tenda ti nga, na oⱡa anggilip ni, ei nga wamp korung mbᵾ, aldpa ⱡoprᵾk kont muⱡing nᵾmp, wu mou rorung ila nit ik ei nga, na akup nim nga kᵾmp keta ila moⱡᵾp kot ent,” nitim.

22 Wote Piliks ndi, mondpa pili wamp nga mbi paka rok etmin uⱡ mbᵾ, pilpa mbi ndurum, wu kᵾⱡ nga ik nᵾtᵾng mbᵾ pilpa mba, wote wu kᵾⱡ kundpa, nimba mel, “El wu kuimbal morum wu Lisiyas om kᵾn, enim nga ik nᵾnmin mbᵾ, nᵾmp kai etᵾp nguimp,” nitim. 23 Wote, Pol nokundrum el wu ni kundpa, Pol kan manga ila petᵾm ei, wak rokᵾn mundana, elim nga wamp mbo, na mbᵾ ndi, mel na mat, ngᵾk teing.

24 Rumbᵾⱡ mat omba puⱡnga, Piliks elim nga Jura amp Drusila nᵾtmin ni, tᵾpa mepa urum. Wote, Pol wangga nilinga, Pol ndi omba, Jisas Kraist kᵾn mondpa pili uⱡ mbᵾ nga ik mat, timan ropa ngurum. 25 Pol ndi, timan ropa uⱡ kun kai mbᵾ iting. Wote, wamp ti ndi, el elim nokundᵾmba mbᵾ mel nimba, wote Jisas aldpa yant omba, wamp kᵾmp tᵾmba uⱡ mbᵾ mel nimba ngurum. Ni kᵾn, wu Piliks pilpa mundmong etpa, Pol kundpa, nimba mel, “Akup nim kelkᵾn pi, wote ui kai ti tem kᵾn, nim wi rop ui nimp.” nitim. 26 Ei kᵾn, Pol ndi, elim ku moni mat ngangga nimba pilpa, ui mat ila, Pol wangga ku nilinga, Pol kᵾn kup etkᵾⱡ, ik nᵾtᵾnggil.

27 Wote, pana raⱡ omba puⱡnga, gapman wu peng mumuk Piliks kongun itim koⱡ ila wu Porsiyas Pestas ndi, omba titim. Piliks, Jura wamp kᵾⱡ kᵾn, mel ti ngeing nimba pilpa, Pol kan manga ila piyangga nimba, pendpa kelpa purum.